Нарэшце да агульнаеўрапейскай акцыі наведвання музеяў у начны час далучыўся і Магілёў. 16 траўня свае дзверы расчынілі для наведвальнікаў этнаграфічны і краязнаўчы імя Е. Раманава. Праўда, на ўсю ноч духу пакуль не хапіла, працавалі музеі толькі з 18.00 да 23.00, але магілёўцы і гэтаму былі бязмерна радыя, хаця ў Еўропе ў такую ноч уваход у музеі бясплатны. 
Ноч музеяў. Магілёў, 16 траўня 2009 г.Не засталася ўбаку і гарадская суполка Таварыства беларускай мовы імя Ф. Скарыны. Гарачыя аматары паездак і экскурсій на чале з кіраўніком Алегам Дзьячковым прынялі ўдзел у акцыі ў якасці наведвальнікаў, утварыўшы асобную групу. Нягледзячы на тое, што з экспазіцыямі "родных" музеяў "скарынаўцы" ў асноўным добра знаёмыя і з'яўляюцца іх прыхільнікамі, падрыхтаваная арганізатарамі праграма прынесла асвяжальную рыску, зрабіўшы прагляд яшчэ больш займальным і запамінальным.
Ноч музеяў. Магілёў, 16 траўня 2009 г.Так, стала дзейсная выстава "Магілёў губернскі" ажыла: гістарычныя персанажы гэтага адрэзка гісторыі горада шпацыравалі па залах, жывая фартэпіянная музыка дапоўніла адчуванні эпохі. І нешта незвычайнае адбывалася з экспанатамі: у гэтую ноч яны перасталі быць нямымі сведкамі, а яркім водбліскам свечак, адлюстраваннем ценяў, адмысловым пераліваннем фарбаў "казалі", што таксама рады сустрэчы. Закаханы ў сваю справу экскурсавод распавядаў так, што не зацікавіцца пачутым было немагчыма. Хацелася блукаць і блукаць па залах, атрымліваючы асалоду ад музейнага асяроддзя і музыкі.
Ноч музеяў. Магілёў, 16 траўня 2009 г.Этнаграфічная экспазіцыя папоўнілася народнымі майстрамі, у якіх можна было тут жа набыць сувенір або знакамітую беларускую цацку-свістульку, і меладычным спевам ансамбля дзяўчын у суправаджэнні народных інструментаў. Асабліва прыемна адзначыць, што распавядаў экскурсавод пра беларускія святы з дэманстрацыяй экспанатаў, якія можна было кранаць і нават апрабаваць у дзеянні, на роднай мове. Незвычайны прагляд экспазіцыі прадугледжваў удзел гледачоў, на што апошнія ахвотна адгукаліся. Самыя актыўныя ўзнагароджваліся сувенірамі, значкамі, буклетамі.
Ноч музеяў. Магілёў, 16 траўня 2009 г.Да краязнаўчага музея "скарынаўцы" накіраваліся ўжо некалькі парадзелай групай. Не вытрымалі марафона ў асноўным, дзеці, хоць справядлівасці дзеля трэба адзначыць, што нават самых малых бацькі "цягнулі" да транспартнага прыпынку сілай.
Ноч музеяў. Магілёў, 16 траўня 2009 г. Гасцей краязнаўчы сустракаў інструментальнай музыкай і… двухгаловым цялём, якога адмыслова дасталі з такой нагоды з запаснікаў. Пасля выдатнай экскурсіі па археалагічным аддзеле самым адважным прапанавалі спусціцца ў сутарэнні музея, дзе можна было агледзець імітацыю курганнага пахавання.
Ноч музеяў. Магілёў, 16 траўня 2009 г.На жаль, толькі 30 хвілін заставалася да кантрольнага званка, г. зн. да закрыцця музея, калі група паднялася на другі паверх. А самага знакамітага экскурсавода горада Тарасаву можна было слухаць гадзінамі, не адчуваючы ныцця ног і стомленасці вачэй. Паўгадзіны праляцелі як адно імгненне.
Ноч музеяў. Магілёў, 16 траўня 2009 г.Разыходзячыся, ТБМаўцы дзяліліся ўражаннямі і суцяшалі сябе надзеяй, што ўжо ў наступным годзе "ноч музеяў" у Магілёве будзе паўнавартаснай, г. зн. да першых прамянёў узыходзячага сонца.
Ноч музеяў. Магілёў, 16 траўня 2009 г.18 траўня ў рамках імпрэзы Міжнароднага дня музеяў на праграму, прысвечаную майстрам жывапісу і скульптуры Магілёўшчыны, якія прымалі ўдзел у Вялікай Айчыннай вайне, запрасіў абласны мастацкі музей імя П. Масленікава. Уваход для наведвальнікаў быў бясплатным.
Гл. таксама:16 і 18 траўня – Ноч музеяў упершыню ў Магілёве (фота) 
